A iniciativa “Eu son redeira” pecha a súa edición 2024
Outro ano máis, a
iniciativa “Eu son redeira” remata con éxito a súa campaña de verán. Esta
proposta leva a diversas localidades galegas mesas informativas, atendidas por
redeiras, nas que a poboación xeral pode informarse sobre o oficio, familiarizarse
con algunhas das artes e aprender sobre as principais inquedanzas e retos da
profesión.
En concreto, este
ano visitou entre xuño e setembro as vilas de Corme, Malpica, Cedeira, Cariño,
A Guarda, Cangas,
Portosín e Porto do Son. As citas coincidiron con
importantes festas locais, o que serviu para xerar un ambiente distendido que
favoreceu o intercambio entre as persoas que se achegaron e as que se
encargaban da parte informativa.
Novamente, a campaña
contou cunha gran recepción entre a cidadanía, que amosou curiosidade e
sensibilidade cara as condicións das profesionais. Espérase poder repetir no
ano 2025, cunha nova xira a través de localidades da rexión.
O proxecto conta coa
colaboración da Consellería de Política Social e Igualdade da Xunta de Galicia,
do Pacto de Estado contra a violencia de xénero e do Ministerio de Igualdade do
Goberno de España.
